Castañazo Rock: o Revival Bravú!

.

Nom sei a quem se lhe ocurriu a idea de fazer um revival do bravú, pero hai que felicitá-lo. Porque a idea nom era trivial: nom havia nengumha efeméride óbvia, se acaso os... 16 (?¡) anos do primeiro disco d'os Diplomáticos. E, porém, como dizia o lema da revista Bravú (4 números só), a situaçom requeria-o. Requeria-o porque foi a época da nossa adolescência, medramos com esta música e estes valores, escoitando histórias de gente à que lhe fervia o peito, histórias de karnotxos e de nakras, de curas pinantes e galos vermelhos, de Xans que se penduravam de carvalhos e de travestis que gastavam os quartos na subhasta das fanecas. Assi que já nos tardava revivir esses tempos, e ali, em Chantada, na noite do 3 de novembro do 2007, nos juntamos Antom, Carlos, Pablo e mais eu. Umha boa tropa da tralha!

.

Chegamos, como nom podia ser menos, tarde, e tras pagar uns módicos 2 €, entramos no mercado gandeiro, onde, como nom, comprovamos que os concertos levavam aínda mais retraso que nós. Assi que aproveitamos para cear: vinho, polvo, bocatas e carne ao caldeiro. Nos bancos atopamos família de Pablo: Ana, que nom se perde umha, e Xan Papaqueixo -que nom o podia perder porque tinha que tocar. Tamém atopariamos mais tarde a outra que nom podia faltar: Miriam, a quem a festa lhe quedava, por umha vez, mais ou menos perto da casa.

Mentres ceavamos começarom a tocar Zënzar, a já veterana banda de Cerceda. Aínda que vivírom a época do bravú nom chegárom a ser incluídos nesse saco, simplemente estavam por ali... fazendo o de sempre, o que mais lhes gusta: rock a saco e sem mais concesiões que as necesárias para desfrutar tocando. A verdade é que esse era o espírito musical bravú: tocar o que che apetece (basicamente rock) sem pretender ires de cool. Nom se farám ricos, pero é provável que morram dando-lhe às guitarras. Entranháveis.

Carlos Blanco fazia de mestre de ceremónias e introduzia os que fôrom, para mim, os grandes trunfadores da noite: Os Tres Trebóns do Rosal, capitaneados por Xurxo Souto e transformados, nesta ocasiom mais que nunca, num all-star bravú. Interpretárom à perfeiçom o que havia que fazer numha ocasiom como esta -homenagear- e acabárom cumha dúzia de músicos no escenário, entre eles gente d'os Papaqueixos e os Diplomáticos. Pero nom nos precipitemos: dizia que revisitárom vários temas dos de Monte-Alto, como "Berbés", pletórico, ou "Estrume" -que Xan nos devia: quase 10 anos atrás, na Festa Folk no rio Dez, passamos todo o concerto d'os Papaqueixos reclamando que a tocaram... só porque el a tocava no disco dos Diplomáticos-. Meicende cheira, Pontevedra apetrena! O momento cúmio foi quando empalmárom "Como o vento", de Radio Océano ("erguemo-nos em silêncio quando nos chama o mar..."), "Tecnotraficante" dos Papaqueixos ("Sito Miñanco preso político!", fazia tempo que nom bailava ska pogueando desse jeito), e "Licor café" de Lamatumbá. Por orde cronológica, agora qeu caio; outro simbolismo mais.

.

Tras semelhante exhibiçom, Cuchufellos tinha-no difícil para manter o nivel. E claro, nom o conseguírom. Quizais, se polo menos nom tardaram mais de média hora em ponher-se a tocar, poderiam ter mantido o ambiente. Pero, polo que a nós respecta, enfriárom abondo a festa -que a essas horas da noite já começava a estar fria de por si, metereologicamente falando. Claro que jogava na sua contra o feito de que nom os conhecia de nada, e conste que nom deixárom mal sabor de boca. Haverá que ve-los noutra ocasiom.

Menos mal que despois vinham uns grandes, provavelmente o mais agardado da noite: o retorno d'os Rastreros. Para os que nom os vimos no seu dia era um concerto especial. E abofé que nom defraudárom. Nom sei se era por jogar na casa ou que, pero saírom super-enchufados e derrochando r'n'r (facciom punkarra) por todos lados. Cançom tras cançom iam subindo o pistom, e de súpeto decatavas-te de que... aínda nom caera nengum hit! Isto si que é ter um repertório amplo. I é que aquel CD que sacaram foi um dos melhores discos da sua época na GZ... e aínda nom esquecérom como defende-lo ao vivo! "Pandeirada salvaxe", "Johnny caraperro", "Rozando nos toxos", "O sacristán de Basán", e como nom, os dous hinos "Vida de Xan" e a moi actual "The Jet(a) Set", co seu retrouso "1000 obreros muertos, a ellos les da igual, la reina se masturba y el rey habla de paz!", que desta vez nom (auto)censurárom como si fizeram no disco.

.

Como a cousa ia de umha de cal e outra de area, tocava baixar o pistom; e isso é o que fizérom Ruxe Ruxe. Nom tenho nada persoal em contra deste grupo, nom me caem mal nem nada, e lembro com agrado o seu concerto alá no Grelo Folk de Monfero, onde já lhes tocara a papeleta de sair despois duns Papaqueixos que rebentaram a noite. Mais, nom sei por que, nom me acabam de convencer. Assi que mentres tocavam aproveitamos para suxeitar um pouco a barra -por se acaso caia- e baixar uns poucos litros -nom nos fossemos deshidratar.

.

E seriam já as 5 quando por fim saírom Motor Perkins. Tinha ganas de ve-los desde que oíra um par de canções suas na rádio. Soam como os Pogues circa 1984-85; e isso, sei-no, é moito dizer. Pero é que estes paisanos do Deça som quem de montar moita festa e de soliviantar os ánimos ao mais puro estilo festeiro-republicano-irlandês. Merquei a sua maketa e agora nom a dou sacado do reproductor do coche, se tedes a ocasiom de atopa-la, aseguro-vos que som 3 € moi bem gastados. Por certo, tenhem canções própias, e tam boas como as versões. Do concerto em si, aparte das boas sensações, nom lembro mais que algumha image e... pouco mais. É-che o malo de tocar a essas horas. Em qualquer caso, rosas vermelhas para eles, e que o vento os leve prá onde correm regatos de whiskey.

.

E quando rematárom retiramo-nos, co corpo derrotado pero o espírito cheo, a tentar durmir um par de horas no coche. Fora umha boa noite, umha para lembrar. Desde logo, o concerto de meses em Arbolícia.