Nºs 1 em Arbolícia: My year in lists

.

Ainda faltam alguns dias para que remate o 2008 e já levo escoitados mais de 40 discos publicados neste ano. Nunca tal me passara: som mais dado a pesquisar entre rarezas de décadas pretéritas, e a profundar no publicado ultimamente mais a posteriori, muitas vezes despois de ver com calma as listas de “o melhor do ano”. Mais este ano a conjunçom de dous factores -estar subscrito a rockdelux (si, confesso-o, este ano dei-lhes umha oportunidade) e poder desfrutar de qualquer disco com apenas uns clicks- fijo que caisse na tentaçom de estar ao tanto da mais raivosa atualidade.

.
Por suposto, esta febre de baixar discos fai que à hora da verdade só escoite em profundidade umha minoria deles, e portanto qualquer tentativa de elaborar umha lista com critério dos mais destacados do ano é bastante ilusória. Ainda assi, e a jeito de resumo apressurado, ai vam algumhas impressões:

.
Nom houvo disco de Arcade Fire que levar à boca, mais um bom sucedáneo foi o Little Death de Pete & the Pirates: estes ingleses conseguem compor hinos de pop eufórico (no disco hai quando menos meia dúzia) com tanta facilidade como os canadianos, ainda que nom espertem a mesma vaga de admiraçom generalizada. Quiçais o disco indie do ano em Arbolícia, na minha mui persoal opiniom... ainda que sei que tal honor corresponderia, de fazer umha enquisa, a Vampire Weekend: talvez mais originais que os anteriores (ainda que a tam traida coartada afro-pop parece-me mui exagerada) e igualmente efectivos. Outros grandes discos de pop no 2008 fôrom o de Port O'Brien (All we could do was sing), com esse temazo que é “I woke up today”; ou os dous de Los Campesinos! (Hold on now, youngster..., e outro mais que nom escoitei), bordeando o single da semana em cortes como “You! Me! Dancing!” ou o que dá título a este post. Algo menos popeiros som No Age, umha revelaçom para mim... e é que estes dous rapazinhos de passado punk se sacárom da manga um Nouns que é sério candidato a disco do ano: energia e melodias para criar canções sublimes como “Teen Creeps” ou “Eraser”.

.
Ainda que se buscamos o hit da temporada hai que acudir, indiscutivelmente, aos MGMT, em cujo Oracular spectacular atopamos duas canções, “Kids” e “Time to pretend”, que som maravilhosas pílulas de eufória em estado puro, mui por em cima do nível do resto do álbum (que nom está nada mal, ainda que basicamente se dediquem a copiar a Bowie). Outros fabricantes de éxitos, mais neste caso sem um disco destacável, fôrom The Teenagers (“Homecoming” e “Starlett Johanson”). E, se os mencionados até agora soam tremendamente atuais, nom acontece o mesmo com a delícia retro (pop vintage circa 1960) do duo She & Him, Volume One. Mais retro ainda que o The Age of the Understatement de The Last Shadow Puppets, o disco que o ghicho de Arctic Monkeys sacou despois de (aparentemente) ter umha regressom temporal a 1966. Deixa-me, igual que o resto do material dos Monkeys, com a sensaçom de ter ouvido algo correto mais nom excepcional.

.
Deixemos a um lado o indie pop mais “canônico” e abramos um pouco os ouvidos. Este foi sem dúvida um ano mui prolífico para a música mais “rarinha”, essa que mistura o pop ou o folk com qualquer cousa que leve o adjectivo “free”. Neste senso, hai que reconhecer que a labor desempenhada nos últimos anos por Animal Collective tem sido mui fecunda. Sem a sua influência quiçais nom existissem discos como o dos Evangelicals (mui grande The evening descends, um favorito que já temos louvado nestas mesmas páginas), o do singular duo The Dodos (o mui notável Visiter, ao que devo umha escoita mais demorada), ou qualquer do doblete dos seus paisanos High Places. Como tampouco existiria o Wagonwheel Blues de The War On Drugs, que conjuga americana e experimentaçom para se constituir num dos cumes do ano.

.
Os próprios Animal Collective publicárom tamém material novo no 2008, ainda sendo um modesto EP, Water courses, que incluia material descartado do seu último disco (nada do outro mundo: hai que agardar polo seu seguinte longa duraçom). Tamém numha onda “experimental” -ou diriamos melhor, no seu próprio mundo- vivem Sígur Rós, cujo luminoso Med sud i eyrum vid spilum endalaust se aproxima ao pop sem perder nada do seu encanto. Bem polos islandeses. A cotas nom tam altas chegam o duplo Microcastle/Weird era cont de Deerhunter, o Heart of the sun de Pantaleimon ou 13 blues for thirteen moons dos Thee Silver Mount Zion (os quais ainda nom recuperárom a mágia de Godspeed You! Black Emperor, infelizmente).

.
A veiga da Americana / Alt. Country e escenas folk relacionadas ofereceu umha boa colheita, como vem sendo habitual nestes anos. Entre o que ouvim salientaria três obras, começando pola que foi a história por excelência da temporada, o For Emma, forever ago de Bon Iver. Difícil resistir-se ao engado dum disco de ruptura sentimental confeccionado durante um duro inverno por um home só numha cabana de caça no meio do monte. Disco intenso e -mália o omnipresente falsete que pode cansar a alguns- redondo, dende a apertura com “Flume” (“I am my mother's only one / it's enough”) até a final “Re:Stacks”. Poderiamos seguir com Fleet Foxes, cujo sonado debut merece (quase) todos os elógios recebidos: se tiveram mais canções como “Your protector” já seria insuperável. E como ignorar o encanto tradicionalista dos Felice Brothers e o seu disco homônimo, onde esta entranhável família ressuscita o espírito -e a música- de The Band?

.
Um curioso exemplo de disco conceptual (já com umha outra conceiçom do folk) temo-lo no Rook de Shearwater, críptico portador dumha suposta mensage ecologista afastada do especismo. Um trabalho bem especial, como tamém o é o Safe inside the day dumha Baby Dee a quem tivemos a oportunidade de ver ao vivo nessa primaVERA prodigiosa de Groningen (voçês já me entendem). Nengum destes dous chega ao nível dos três discos citados anteriormente, mais merecem umha escoita. E se falamos de Baby Dee é inevitável lembrar-se de amigos seus como Antony & The Johnsons (quem publicou o EP Another world) e Joan as Police Woman, (To survive) que nom estarám entre os vencedores do ano mais nem muito menos caem na categoria dos fracassos. E nom podemos fechar o capítulo folki sem lembrar que tivemos tamém disco de Micah P. Hinson, desta vez acompanhado no título pola Red Empire Orchestra. O nosso texano favorito é agora feliz junto à sua mulher e a vida sorri-lhe; isto nota-se na sua música mais nom tem por que ser algo mau: já nom nos sorprenderá como antes, mais polo de agora consegue manter o nível.

.
Fóra de toda categoria está o disco de Crystal Castles. Nom se me ocorre mais que dizer que é umha obra sorprendente, impactante e refrescante, cujos sons parecem ter sido elaborados com máquinas “de marcianos” de salom recreativo. Escoitade a inicial “Untrust us” ou o éxito “Crimewave” e julgade por vós mesmos. Ao seu lado TV On The Radio parecem mesmo normais; claro que para eles o normal é seguir sacando discos como Dear science, que tenho pendente de escoitar em profundidade mais que apunta mui alto dende a primeira audiçom.
.

Poucas incursões fixem no mundinho eletrônico, mais coido que as escolhim bem: London Zoo é um fantástico compéndio de música quente e bailável de agora mesmo (por muito que o queiram alcumar de dubstep, pouco tem a ver com propostas gélidas -se bem excelentes- como Burial: isto é mais dancehall de toda a vida). O seu autor, The Bug, é um velho conhecido da escena británica que reuniu muitas cartas ganhadoras e confeccionou este peassso vinilo que consegue dar continuidade aos logros alcançados por MIA em anos prévios. Nem a palavra eletrônica nem outras como trip hop servem já para descrever o que fam Portishead. Protagonistas de um dos retornos mais sonados dos últimos anos, com Third conseguírom de umha tacada o que parecia impossível: retomar o nível dos seus dous primeiros e fabulosos discos (publicados hai já mais de umha década), reinventar-se por completo... e seguir soando exactamente a Portishead. De expediente X.

.
Tamém de expediente X é a capacidade que tem Nick Cave de encarnar o espírito do rock'n'roll canalha e selvage, afastado do papel de crooner adoptado em anos anteriores. O Dig, Lazarus, Dig! que sacou com os Bad Seeds é outra prova delo. A outros, por mais que me pese, nom lhes acontece o mesmo: e é que os meus queridos REM seguem que nem fu nem fa. Accelerate é a mostra de que conhecer a causa nom implica ser capaz de lhe por remédio: bom intento, chicos, de verdade que se nota e se agradece o esforço, mais... haverá que tentá-lo outra vez, pois este disco (que é melhor que o Reveal e o Around the Sun, certo) nom passa dum notável baixo e vós sodes capazes de muito mais. Outros ilustres veteranos acertárom algo mais, como de Jason Spaceman que com Songs in A&E nos trouxo de volta o evangélio Spiritualized com temas como “Sweet talk” (Rolling Stones circa 1969) ou “Soul on fire”. Por nom falar do nosso chamám favorito, Julian Cope, cultivador dumha espécie de paganismo anarquista à la Alan Moore que ainda alimenta a sua inspiraçom o suficiente para fazer discos como o generoso, em duraçom e inspiraçom, Black Sheep.

.
Enfim, para nom deixar disco sem mencionar, aí estám o Attack & Release dos Black Keys (rock clássico setenteiro), o Saturdays = Youth de M83 (dream-pop oitenteiro), Rabbit habits de Man Man (estes inclassificáveis de Philadelphia ainda nom conseguírom igualar em disco a experiência dos seus diretos), The Bedlam in Goliath de The Mars Volta (outro disco que ganha ordes de magnitude ao vivo) ou o Cronolánea de Lori Meyers (quando se ponhem roqueiros quase poderiam lembrar a Los Enemigos... quase). Quentinhos, recém baixados, hai alguns com mui boa pinta: os de Walkmen (You & Me), Bowerbirds (Hymns for a dark horse), ou Jolie Holland (The living and the dead), por exemplo. Por nom falar de outros que estám ainda agardando, como os de Mogwai, Bloc Party, Oxford Collapse, Built to Spill, Okkervil River, Rokia Traoré... Ah, tantos discos e tam pouco tempo...

.

Liquidámbar em Outono

.
Mes a mes, o nosso amigo muda as suas cores... até ficar nu.
.

Gogol Bordello - In the old times it was NOT A CRIME!!

.

Um fantástico combo que une festa, folkismo e energia punk, como uns novos Pogues 20 anos despois... cambiando a herdança irlandesa pola cigana e do leste de Europa. Souvem deles escuitando por casualidade o programa "Aberto por reformas", onde resenharam o seu já mítico concerto em Paredes de Coura '07 e pincharam algumas canções. Lembro que ia conduzindo e anotei como puidem o nome do grupo (foneticamente, claro) nalgum papel que tinha polo carro, para ponher-me a baixar os seus discos ao chegar a casa. Não me decepcionaram, especialmente o Underdog World Strike (2005), uma obra mestra das que nom saem muitas numa década.

.

.

Enfim, que tinha muitas ganas atrasadas de ver a Gogol Bordello, sobre todo despois do intento frustrado do verão (quando, tras ter previsto ir, a preguiça de última hora, o mal tempo e a perspectiva de me ter que deslocar a Vilagarcia desde Paradela disuadiram-me de fazê-lo). E esta ocasiom, a do 11 de dezembro de 2008 em Compostela, não a podia perder. Assi que ali fum, com Jose e com escala prévia em Cangas, para me atopar com Carlos e um par de amigos. O sítio não podia ser melhor: a sala Capitol, que pendurara o cartel de "não hai bilhetes" e de certo estava ateigadíssima de gente. Visto que alcançar as primeiras filas era missão impossível optamos por ir à parte posterior, que a jeito de palco (vestígio do passado da Capitol, que fora anteriormente um cine) permitia ver o escenário com bastante mais detalhe que desde abaixo. A única pega era não estar entre a multitude para poguear salvagemente, mais bom, a fim de contas isso também o puidemos fazer... e com mais espaço.

.
.

Como chegamos com bastante retraso, não puidemos ver aos teloneiros, Che Sudaka (que sairiam ao final para tocar "Mala vida" de Mano Negra junto aos Gogol Bordello); mais quase melhor assi, pois ali iamos ao que iamos.

.

Eugene Hütz, o frontman, saiu só com a sua guitarra, seguido em seguida polos demais integrantes da banda. Pletóricos desde o início, desgranárom todo o seu catálogo de tralhazos, fazendo frequentes visitas ao mencionado Underdog World Strike: Not a crime, Immigrant Punk, Indestructible... Com a sala a estoupar, o espectáculo era digno de ver-se. Não faltou tampouco American Wedding (super-taran-taran-taran-ta-ta!), da que ficaramos até o cú este mesmo verão em Paredes (as pantalhas do festival não botavam outra cousa), mais que aqui foi dos momentos cume da noite.

.

.

Tremendo concerto, em resumo, no que os neoiorquinos dérom o que se esperava deles, confirmando que agora mesmo Gogol Bordello são um dos melhrores grupos para ver ao vivo. Se voltam, repetiremos. E polo que respeita a aquela noite, seguiu polas ruas de Compostela, fomos ao Matadero... e rematamos no piso franco de Carlos em Oroso. O dia seguinte era venres, dia de garabulhos, mais como era de prever, resultou pouco produtivo.

Quanto mais conheço os cães...

.
... menos apreço os humanos.

Santuário

.

No lugar mais improvável, à beira da autovia. Algo ferido polo lume. Um lugar sacro, incapturável com a cámara

O Courel em Outono: A Devesa da Rogueira

.

Apenas o provaramos na primavera; agora voltamos no mes de outono.

.

Entre Ferreria e Seceda

A devesa

Fervença

Seguimos a subir

Ponlas

Eiqui sempre foi bosco (Novoneyra dixit)

A louseira dos Talís

Já de volta, cara abaixo

O souto primigénio

Área Metropolitana de Vigo e Ponte Vedra

.

A grande metrópole do Sul da Galiza é indiscutivelmente um continuum urbano que abrangue dende a cidade de Ponte Vedra até o Minho. Consta de várias bisbarras relativamente cativas e facilmente identificáveis: Ponte Vedra, o Morraço, Vigo, Redondela, o Val Minhor, a Lourinha, o Baixo Minho e o Condado. Podem-se incluir tamém dentro deste espaço as terras dos montes meridionais da dorsal galega, principalmente o Suído e a Paradanta. Toma-se partido aqui, pois, por umha única área metropolitana foirmada por uns novos concelhos que correspondam com estas bisbarras, tal e como se descrevem a seguir:

Ponte Vedra

Incluímos nesta bisbarra (e portanto no correspondente concelho que cumpriria criar) o espaço dos atuais concelhos de Ponte Vedra, Barro e Poio, assi como as parróquias de Figueirido, Bértola e Vila Boa, pertencentes a dia de hoje ao município de Vila Boa.

Redondela

A vila de Redondela é a capital dumha bisbarra que abrangue ademais do seu município os contíguos de Souto Maior e Paços de Borbém. No seu partido judicial inclui-se tamém o de Fornelos de Montes, que incluímos pola sua sua similitude geográfica na comarca de Suído-Montes.

O Morraço

Comprenderia os atuais concelhos de Marim, Bueu, Cangas e Moanha (que som os que conformam esta comarca segundo o Mapa Comarcal -M.C.- da Junta de Galiza), assi como as parróquias de Cobres do concelho de Vila Boa. Este último concelho tem umha adscriçom ambígua, sendo moi próximo em todos os sentidos a Ponte Vedra (em cuja comarca foi enquadrado segundo o devandito M.C.) mais fazendo parte já -polo menos Cobres si o fai de forma clara- da península do Morraço. Proponhemos portanto que a bisbarra do Morraço se constitua num concelho integrado polas comunas que se amosam no seguinte mapa, as quais se correspondem -com pequenas modificações- com as parróquias históricas.

Vigo

O atual concelho de Vigo é relativamente extenso, incluíndo no seu território terreos maiormente rurais. Constitui portanto por si só umha bisbarra, à que se lhe poderia engadir a parróquia de Chapela, atualmente no concelho de Redondela.

Val Minhor

Esta bisbarra (atuais concelhos de Baiona, Nigrám e Gondomar) forma umha unidade claramente individualizada, tanto se se considera a geografia física como a humana. A estrutura de povoaçom é descentralizada, solapando-se as os distintos núcleos entre si. A vila de referência é, já dende a Idade Média, Baiona.

Baixo Minho

Comarca artelhada geograficamente en torno ao val do Rosal, que a ocupa só parcialmente. O papel de cabeceira comarcal corresponde-lhe principalmente a Tui, histórica capital de província, sé episcopal e cabeça do partido judicial que se corresponde com esta comarca, ademais de tradicional fronteira de passo a Portugal por ser aqui onde estava a principal ponte sobre o Minho arraiano. Mas a decadência desta vila fai que hoje em dia tenha tamém influência a Guarda, importante porto pesqueiro situado no extremo oposto da comarca, já no atlântico. Entre ambas, os atuais municípios de Tominho, o Rosal e Oia.

Lourinha

Pequena bisbarra natural formada pola terra regada polo rio Louro. Consta dos atuais municípios de Mos e o Porrinho, e corresponde-se com a área de influência desta última vila. Toda a comarca tem um forte carácter de área de expansom económica da cidade de Vigo, contando com vários parques industriais que albergam algumhas das mais importantes empresas da área metropolitana.

.

Condado

Denominaçom que se remonta à idade média para umha bisbarra que gira arredor da vila de Ponte Areas. Esta suma ao seu tradicional papel de cabeceira comarcal o mais recente de cidade satélite de Vigo, em cuja área de expansom industrial e demográfica se insire. Integram tamém a comarca os atuais municípios de Mondariz e Mondariz-Balneário, as Neves, Salvaterra do Minho e Salzeda de Caselas. Cómpre sinalar que este último nom tem umha clara adscriçom geográfica, debatendo-se entre as influências das áreas do Condado, a Lourinha e o Baixo Minho tudense. No mapa comarcal da Junta de Galiza optou-se por incluí-lo na comarca viguesa (dentro, portanto, do que seria a bisbarra da Lourinha ou do Porrinho, a cujo partido judicial pertence).

.

Paradanta

Comarca fortemente ligada à vezinha do Condado, entre outras razões por fazer parte do partido judicial de Ponteareas. Zona de transiçom entre os tramos baixo e médio do Minho, entre a costa e o interior, entre a área viguesa e a ourensá. A centralidade corresponde à vila da Caniça, situada entre os municípios minhotos de Arvo e Crecente e o montanhoso do Covelo, na própia serra d'a Paradanta que dá nome à bisbarra.

Suído-Montes

Bisbarra nom existente no mapa comarcal da Junta, no que os municípios que a formam se repartem entre as comarcas de Ponte Vedra (Campo Lameiro, Cotobade, a Lama e Ponte Caldelas) e Vigo (Fornelos de Montes). Está constituído polas terras da vertente occidental da Serra do Suído, semelhantes à Paradanta e à histórica bisbarra vezinha de Terra de Montes (Cerdedo, Forcarei, Beariz)

A singularidade vai chegar...

.

... ou talvez nom. Que pensades?

Umha "singularidade tecnológica" é um salto qualitativo no desenvolvimento humano, produzido num momento histórico concreto. Actualmente, a singularidade por excelência refire-se à eventual apariçom dumha inteligência sobre-humana autoconsciente. É dizer, e desbotando apariçons extraterrestres:

.

• ou bem a criaçom, por parte de seres humanos, de máquinas que nom só nos igualem ou superem em inteligência, senom que ademais tenham consciência de si mesmas,


• ou bem o aumento artificial da inteligência humana (um "upgrading", por assi dizer) por meio de próteses ou software adicionado.

O quid da questom está evidentemente em que é a Consciência, como defini-la, como detectá-la, e como seria possível -se é que o é- que umha máquina a adquira. Nom som a única persoa à que, matinando nestas questons, se lhe ocorreu que, sendo a consciência um produto cerebral e o cerebro a fim e ao cabo umha máquina (da que desconhecemos moito, mas cujo comportamento a pequena escala já somos capazes de reproduzir por meio de redes neuronais artificiais), talvez seria possível criar umha máquina consciente. A história da técnica amosa que avanços nom imaginados som possíveis, e a lei de Moore sobre o medre exponencial da capazidade computacional é de aplicaçom em vários ámbitos; polo que podemos polo menos imaginar um escenário onde a nossa consciência seja transferida a umha máquina capaz de armazená-la e reproduzi-la. Como o tema dos androides tamém vai evoluindo, o sonho da inmortalidade quase se pode albiscar à volta da esquina.

Parece brincadeira mas nom é. O IEEE, a associaçom de engenheiros da que fai parte o que escreve (e que é a meirande organizaçom profissional de carácter tecnológico do mundo), sacou recentemente um informe especial ao respecto, cuja leitura recomendamos. Nel podem-se atopar moitos artigos com opinions para todos os gustos, desde os que pensam que a singularidade vai chegar em poucas décadas até os que desbotam totalmente essa possibilidade, passando polos que adiam a sua chegada a um futuro distante. Em qualquer caso, os expertos consultados som nos mais dos casos autênticas luminárias, gente de reconhecido prestígio (professors do MIT e gente assi), o que fai deste estudo umha leitura mais que interessante.

.

O Adelino de Igor Lugrís

.
A Adelino
quando lhe perguntavam
dizia que trabalhava no polígono industrial
E nom era mentira

A sua família sempre tivera umha leira
em aquele terreo
no final da costa de vacas
Fora de seu pai
E da sua avó
E da mae desta
Ele nunca tivera vendido
mas foi expropriaçom forçosa
É polo bem de todos
diziam-lhe no bar à hora dos cafés e as partidas

Comprou
justo onde tivera as patacas
umha parcela com o dinheiro que lhe dérom
e a pensom dos anos em Zurique
Só havia três naves
um burguer com karaoke
e a sua horta

Quando lhe perguntavam
dizia que trabalhava no polígono industrial
E nom era mentira

Da Revista das Letras do Galicia Hoxe, 04/09/08

O Pindo

Monte de ressonâncias míticas, garda da Costa da Morte polo Sul, olimpo celta. Gigantes de pedra, vegetaçom singular, regatos cristalinos e mesmo as rochas dum castelo derrubado polos irmandinhos. Umha subida coroada por umha vista desde o mar a Compostela, do Barbança a Soneira.

Por umha nova divisom administrativa da Galiza

.

.

Reproduzimos aqui, apesar de repetir-nos e para que este blogue seja auto-contido, o post que publicamos no blogue irmao Outra Esquerda.

Exporemos em primeiro lugar de jeito mui breve a nossa proposta de reestruturaçom territorial do país, para despois passar a fazer umha justificaçom mais pormenorizada.

Digamos entom, a modo de resumo, que avogamos por um país formado polas seguintes entidades:

- As unidades principais, responsáveis de exercerem as competências nom assumidas polo poder central galego, seriam os novos Concelhos, originados num processo de fussom dos existentes. Eliminariam-se assi os concelhos atuais, que julgamos inoperantes e carentes de qualquer fundamento geográfico, econômico ou sociocultural. Os novos concelhos seriam de maior tamanho, acadando a dimensom necessária para poder fornecer os cidadãos dos serviços que lhes competem ao tempo que aseguram a sua viabilidade. Em termos gerais, estes novos concelhos concidiriam com as bisbarras ou comarcas que venhem existindo no país, e chamaremo-los portanto de aqui em diante “Bisbarras”, a fim de evitar confusões com os concelhos atuais.

.

- Como nível administrativo mais próximo ao cidadão instituiriam-se as novas Parróquias, as quais nom teriam por que coincidir necessariamente com as atualmente existentes. Corresponderiam-se com umha ou várias parróquias atuais (no ámbito urbano, com um ou vários bárrios), e cumpririam a funçom de serem a primeira canle de participaçom popular nos assuntos comuns. Funcionariam em base a assembleias abertas nas que teria lugar o debate vezinhal acerca dos assuntos locais. Para o traslado das decissões assembleares ao concelho (a fim de comunicar-lhe qual é a opiniom maioritária entre a povoaçom), e viceversa (para informar aos vezinhos sobre as actuações municipais), eligiria-se um representante ou pedáneo. Para nos referir a estas novas “parróquias civís”, e a fim de diferencia-las das atuais parróquias ou freguesias eclesiásticas, empregaremos o nome de “Juntas Locais” ou “Comunas”.

.

- Eventualmente, os novos concelhos poderám-se associar com outros da sua contorna a fim de coordinar acções e mancomunar serviços. Apareceriam assi Áreas Metropolitanas ou Regiões Funcionais, a depender de se o ámbito é urbano ou rural. Estas associações de concelhos nom constituiriam um nível administrativo mais, nom tendo carácter permanente nem exclusivo: um concelho poderia fazer parte de umha, várias ou nengumha, segundo a sua conveniência. Por exemplo, os concelhos do Golfo Ártabro poderiam constituir umha área metropolitana da Crunha-Ferrol, da que bem poderia fazer parte Bergantinhos, dada a vinculaçom da sua parte oriental (Carvalho, Laracha) com a cidade da Crunha; sem que isto impedisse a participaçom a maiores de Bergantinhos numha hipotética associaçom de concelhos da Costa da Morte. É dizer, nom se propugna umha regionalizaçom do país que divida Galiza administrativamente em 8 ou 10 áreas, mais si se contempla a possibilidade de que os concelhos se associem entre eles sem necessidade de criar estruturas permanentes.

.

Exponhem-se a seguir os motivos que fundamentam esta proposta.

.

A administraçom local é a mais cercana à cidadania, e a forma que adopta condiciona a eficácia e a eficiência dos serviços que presta. No caso galego, é claro para qualquera observador que a actual divisom administrativa é mui pouco ajeitada às necessidades que deveria cubrir. É preciso (tal e como já se vem reclamando desde diversos ámbitos, incluíndo o político ou o académico), umha profunda reforma que a acerque à realidade, e que ao mesmo tempo sirva para ponher os alicerces do país que queremos construir.

O problema pode-se resumir mui brevemente em que:

a) o tamanho da maioria dos concelhos é insuficiente para poder afrontar convenientemente as tarefas que tenhem assignadas.

b) estes concelhos rara vez correspondem a algumha unidade realmente existente, bem seja de carácter geográfico, demográfico, económico ou cultural; polo que, apesar de contar com quase 200 anos de existência, nom conseguírom criar nengum tipo de identificaçom por parte dos cidadãos que supostamente representam, nem constituem instrumentos verdadeiramente úteis para servi-los.

PANORAMA CRONOLÓGICO

A causa do problema está na mesma orige das demarcações actuais. Estas remontam-se à primeira metade do s. XIX, quando se instaurou a divisom territorial espanhola proposta por Javier de Burgos. Daquela dividiu-se Galiza em 4 províncias totalmente artificiais, que nom respostavam a razom nengumha mais alá da de copiar o sistema “departamental” traído da França (a opçom de manter as 7 províncias do Reino de Galiza vigentes até entom teria sido igualmente artificiosa, agás polo simple feito de manter a tradiçom). É significativo que a medida ocasionou o primeiro grande levantamento armado na Galiza desde o tempo dos irmandinhos: o provincialismo, que defendia a criaçom de umha única província que mantivesse assi a unidade do país galego. As 4 províncias, com as suas “deputações”, mantenhem-se até a actualidade, mesmo quando ninguém defende hoje em dia a sua utilidade, exceptuando alguns parásitos que vivem delas (e nom todos). Mais a principal característica de aquela divisom foi a escolha do primeiro nível administrativo local: os concelhos. Vejamos este tema mais polo miúdo.

Desde fai muitos centos de anos, a povoaçom galega agrupa-se em células de umha pervivência insólita: as parróquias. O termo, proveniente do grego paroikia (que significa moradia ou juntança de vizinhos), designa um ámbito existente em muitos casos desde antes da chegada dos romanos, e que chega até os nossos dias tras séculos de institucionalizaçom através da Igreja católica. Na inmensa maioria do território galego (exceptuando as 7 cidades e algumhas grandes vilas) a identificaçom efectiva, práctica, de cada indivíduo fai-se, nom a respeito do município, senom da sua parróquia. Som os habitantes de cada parróquia os que se auto-organizam para fazer as festas patronais, por exemplo, no que constitui o mais gráfico exemplo da sua vitalidade. O qual resulta sorprendente se consideramos que, salvo puntuais alterações, estas mantenhem-se inmutáveis: as 3.571 parróquias citadas nas “Relaciones de Felipe II” em 1587 som basicamente as mesmas que as 3.811 que apareciam no “Censo general de la población” de 1960, quatro séculos despois (a efectos prácticos, e descontando as chamadas “anexas”, o número de parróquias pode cifrar-se em algo menos de 3000).

Se se tivera feito umha divisom administrativa ajeitada à realidade social, teriam-se escolhido as parróquias como unidade básica. Isto presentava o inconveniente de produzir um número mui elevado de concelhos, e de mui baixa povoaçom, polo que nom eram apropiados para o sistema funcionarial espanhol que se queria artelhar. O lógico, entom, teria sido ir cara a unidade inmediatamente superior às parróquias: as comarcas ou bisbarras. Estas correspondem-se com unidades geográficas, geralmente artelhadas em torno a vales ou serras, que determinam unidades socio-económicas, e que freqüentemente se denominam como “Terra de...”. Por serem um ámbito mais extenso que as parróquias, a sua natureza é por força mais difusa, polo que nom existe umha “lista única” de bisbarras. Mais, apesar de isto, constituem realidades facilmente identificáveis: o seu número pode oscilar nas diferentes versões entre 50 e 60 e pico, o que constitue umha pequena oscilaçom. Na sua maioria estám mui bem definidas, e correspondem a entidades identificadas tanto a nivel culto como popular, como Trives, Caldelas, Ribeiro, Deça, Terra Chá, Soneira, Barcala, Morraço, Condado, etc, por ponher exemplos de toda a geografia galega.

Mais as bisbarras nom fôrom adoptadas tampouco como a base para constituir os novos concelhos. Estes teriam sido demasiado grandes, comparados com os do resto do Estado, e o afam uniformizador que impulsou essa divisom nom podia tolerar isso. Assi, optárom por umha opçom intermédia, e criarom uns concelhos “saídos da nada”, que abranguiam várias parróquias e nom chegavam a ter entidade comarcal. Os 315 concelhos actuais som os herdeiros diretos dos criados no s. XIX.

É claro que a consideraçom de que as bisbarras som grandes de mais para constituir-se em concelhos podia ser um argumento de peso no século XIX, quando percorrer 20 quilómetros ida e volta, a pé ou em carro de bois, suporia perder um dia de trabalho. Mais é absurdo no mundo actual, quando essa viage se pode fazer em menos de umha hora aínda polas peores estradas. Ademais, se os concelhos rurais fôrom dimensionados para a sociedade decimonónica, é evidente que neste século XXI, no que muitos deles contam apenas com a metade (!) de habitantes que daquela, nom podem ser já ajeitados à nova realidade.

COMPARATIVAS: PAÍSES DA NOSSA CONTORNA

Espanha (nom incluíndo a CAG) tem 8.111 municípios, com umha extensiom média aproximada de 60 km2 e umha povoaçom de 5.450 habitantes. Os 315 galegos, geralmente maiores, tenhem umha extensiom de 93 km2 e 8.500 habitantes. Estes dados asemelham-se aos das parróquias (parish) escocesas (90 km2, 5.800 hab.), que curiosamente som entidades sem funçom administrativa algumha e que simplemente servem para comunicar a instâncias superiores a opiniom pública maioritária nelas. No complicado sistema administrativo británico estas parróquias atopam-se tamém em Gales e Inglaterra, onde contam, aqui si, com uns concelhos comunitários eleitos cada quatro anos que gestionam alguns serviços básicos (e que rara vez recebem salário por isso). Em Escócia existem tamém estes “concelhos comunitários” pero nom coincidem exactamente com as parróquias, sendo o número destas algo inferior. Nas Ilhas Británicas existem outros níveis administrativos que variam segundo a funçom que cumprem, mais o equivalente aos municípios espanhois poderiam ser as “council areas” em Escócia, as “principal areas” galesas e os distritos ingleses. Estas entidades tenhem, mesmo dentro de cada país, distinto carácter segundo a realidade que representem (urbana, rural...), e adoitam ser muito maiores que os concelhos espanhois: em Escócia, por exemplo, cada “council area” tem de média 2.500 km2 e 160.000 habitantes.

No caso mais cercano a nós, Portugal, atopamos que os concelhos (308 em todo o país: menos que em Galiza, mália ser mais de três vezes maior) contam com 300 km2 e 35.500 habitantes de média –consideravelmente mais que em Galiza e Espanha. Estas cifras som qualitativamente semelhantes às que teriam as bisbarras galegas de constituir-se em concelhos. Mais em Portugal existem tamém (logicamente) parróquias. Chamam-se freguesias e contam com certo reconhecemento oficial, existindo as chamadas Juntas de Freguesia. A extensom média de cada freguesia é de uns 22 km2 (algo mais do duplo que as parróquias da Galiza) e a sua povoaçom é de em torno a 2.500 habitantes.

Mencionaremos tamém a administraçom da França, que consta dos seguintes níveis: 22 regiões continentais -incluíndo Córsega-, 96 departamentos, 341 arrondissements, 4032 cantons, e 36.680 comunas. Destes, só as regiões, os departamentos e as comunas tenhem assembleas e governos eleitos. As comunas, o “equivalente” aos concelhos, tenhem umha extensiom média de 18 km2 e umha povoaçom de 1.750 habitantes, sendo portanto similares às freguesias portuguesas.

UMHA PROPOSTA

É necessário aumentar o tamanho dos concelhos galegos, especialmente os rurais, com o fim de dotar-lhes de um tamanho minimamente viável para cumprir as suas funções. Isto nom deveria ser feito de forma aleatória ou desordenada, senom tendendo a fazer que os novos concelhos se correspondam com as bisbarras ou comarcas verdadeiramente existentes (nom implicando isto que devam coincidir com as do mapa comarcal criado a finais dos ’90 pola Xunta de Galicia).

Estes concelhos poderám agrupar-se, se assi o desejar, em áreas metropolitanas, com a finalidade de realizar planificações e acções de governo conjuntas entre aqueis concelhos que decidam mancomunar alguns serviços. Em princípio semelham necessárias e mesmo urgentes duas àreas metropolitanas: a da Corunha-Ferrol e a de Vigo-Pontevedra.

As parróquias –ou as localidades existentes no seu caso- devem ser reconhecidas oficialmente, e nos novos (e maiores) concelhos jogarám um papel mais importante do que até agora. Ali onde os vezinhos assi o requiram, criarám-se juntas parroquiais nas que se debaterám em assembleia os asuntos comunitários, e que escolherám representante(s) ao(s) que consultarám os concelhos nos asuntos que lhes afectem. Já que nom necessariamente as novas entidades se corresponderám com as parróquias existentes, propom-se empregar um novo termo, como p.ex. comuna, para designa-las. Possivelmente, na maioria dos casos (e sobre todo no rural) haverá umha correspondência direta parróquia-comuna, mais tamém pode haver comunas correspondentes a núcleos que nom som parróquia (aldeas ou bárrios), ou várias parróquias que se agrupem numha comuna (tanto se som parróquias rurais como se constituem umha vila).

Por suposto, as províncias devem deixar de existir, cedendo as deputações provinciais as suas competências aos novos concelhos –os quais poderám exercitá-las, no seu caso, de jeito mancomunado dentro das áreas metropolitanas ou regionais.

Como conseqüência do dito anteriormente, propom-se o mapa que ilustra este post, no que se indicam os novos concelhos que se poderiam criar. Entendendo, por suposto, que se trata apenas de umha possibilidade entre moitas outras. E, o mais importante, que nengumha divisom administrativa deve ser vista como definitiva, senom susceptível de ser modificada em qualquer intre em que os seus habitantes considerem que é preciso para poder servi-los melhor. Por debaixo destes concelhos haveria umha comuna por cada parróquia ou localidade, que nom se representam no mapa.